陣營氣氛差勁又試新丁 西班牙咬唔入智利

猪拉多纳

02/09/2011
文： 亨格比利

兩回合嘅西班牙超級盃，令皇家馬德里同巴塞隆拿嘅仇恨入侵埋西班牙國家隊陣營！「鬥牛兵團」今晚喺瑞士聖加倫同智利拍跳，主帥迪保斯基唔止要搞和諧，仲要做埋湊仔公派3位新丁上陣，試陣味濃陣營氣氛又唔好，未必咬得入智利，寧吼2.4倍「讓球客勝」。（now631台周六凌晨2:45直播）




西超盃次回合踢到開晒拖，雖然皇馬門將卡斯拿斯向巴塞兩巨頭佩奧爾、沙維耍冧，但兩會嘅怨恨冇因此淡忘。今期「鬥牛兵團」由皇馬、巴塞做大戶，足足有14人嚟自上述兩隊，教練迪保斯基賽前表示陣營氣氛唔好，但會盡力修補兩軍國腳關係，講就易，你估你係社工咩！


智利落柯打進攻報仇


此外，佩奧爾同碧基一對中路守將因傷落選，加上今仗只係熱身賽，4日後喺歐國盃外圍賽對列支敦士登先打真軍，所以迪保斯基連馬真拿同卡迪維拿兩位經驗豐富嘅守將都唔揀，提升希杭嘅波迪亞、馬體會嘅艾華路杜明基斯、巴塞B隊嘅蒙坦耶3位小國腳，擺明試新仔，防線有隱憂。




對家智利近8場國際賽只曾1敗，為咗報番南非世盃分組賽一敗之仇，領隊保格希已經落晒「柯打」大打進攻足球，預期阿歷斯山齊士、維達爾同伊斯拿呢班好波之人都會擔正，要偷西班牙雞唔係冇機。