日本「黃金聖衣」搶攻北韓

猪拉多纳

02/09/2011
文： 走肖

漫畫《聖鬥士星矢》有「黃金聖衣」，着上身除咗型，仲好打好多。日本今晚喺世盃亞洲區第3圈外圍賽C組主場對北韓，決定以金字版波衫登場，紀念佢哋重奪亞洲盃冠軍喎，1.73倍「讓球主勝」當然要吼實，對家北韓依靠日職外流球員搶分，當然唔夠正版日本打啦！（開賽時間：周五晚6:20）


紀念重奪亞洲盃冠軍


日本足協講明，金字版波衫係代表亞洲盃冠軍身份，咁張揚，呢場梗係要威，何況即使有前鋒本田圭佑、中鋒森本貴幸同中場中村憲剛因傷退隊，國際米蘭左閘長友佑都未好番晒落選，依家日本依然大把攻擊球員用，李忠成＋香川真司＋岡崎慎司配合大批外流球員，足夠攻到北韓有氣冇碇抖。




至於北韓，根據日本足協收到嘅名單，隊長洪映早並冇隨隊，咁即係話，今場靠晒川崎前鋒出身嘅波琴射手鄭大世，同埋柏雷素爾中場安英學、仙台維加泰中場梁勇基同大阪櫻花後衞金聖基搶分，佢哋有幾多斤両，相信日本教頭沙哲朗尼肯定查到一清二楚，想製造冷門賽果自然更加難。




埼玉打風北韓冇練波




仲有呀，呢幾日埼玉縣打大風，試過搞到北韓操唔成，假如今晚踢得成，佢哋唔夠時間練波真係凶多吉少。