3強同分不容有失 葡萄牙炒塞省招牌

猪拉多纳

02/09/2011
文： 巨高

歐洲國家盃H組賽事，塞浦路斯主場對葡萄牙。呢組形勢都幾過癮，三支球隊包括葡萄牙、丹麥及挪威同得十分，而塞浦路斯及冰島就未贏過，葡萄牙想喺三強之中突圍而出，未來日子可謂不容有失。雖然賽前傳出後衞卡維奴因與領隊保羅賓度鬧交而突然退隊，但相信個別事件唔會影響到葡萄牙爭勝決心，「讓球客勝」可放心捧場。（now 634周六凌晨2時45分直播）


塞浦路斯旨在學習


塞浦路斯經常邀請球隊到主場比賽，奈何球隊實力有限輸多贏少，上戰所擊敗嘅摩爾多瓦亦只不過係弱勢球隊，戰鬥力不足葡萄牙抗衡。其實塞浦路斯自己知自己事，所以每次打外圍賽都係本住學習心態，唔會畀球員太大壓力，尤其今場對住擁有C朗、拿尼、普斯迪加等超班人腳嘅葡萄牙，塞浦路斯又點敢有奢望。




葡萄牙於去年九月，主場曾意外賽和塞浦路斯四比四，當時球隊被彈到體無完膚，今仗肯定想報仇。無論球員、往績及決心，葡萄牙都喺主隊之上，「讓球客勝」無理由錯過。