紐亞返史浩克預咗被噓

猪拉多纳

02/09/2011


德國隊今晚主場出師，不過喺蓋爾森基興嘅史浩克球場布陣，未必會得到全部六萬球迷支持，皆因今仗係由史浩克轉投拜仁嘅紐亞，喺轉會後首次重返母會比賽，大批激進嘅史浩克球迷都視佢為叛徒，今晚隨時噓聲多過掌聲。




德國國家隊經理比亞荷夫賽前特別呼籲球迷唔好倒戈相向，佢話：「今場紐亞唔係身披拜仁戰衣，而係為國出力，希望球迷以國家利益為重。」而紐亞亦喺facebook自白：「轉會拜仁係為咗改變自己、提升自己，不過我始終係一個史浩克人，一直感謝史浩克球迷多年來對我嘅關心同支持。」




不過，史浩克球迷就唔係咁領情，球迷會會長亦公開話：「紐亞講過會留低，但最後唔算數，我哋真係好嬲佢。」亦有史浩克球迷喺facebook對紐亞回應：「作為一個門將，你係第一，但作為人，你乜都唔係！」相信紐亞今晚除咗要面對奧地利嘅前鋒，亦要有被主場球迷柴台嘅心理準備。