巴塞後防穿窿大無畏

猪拉多纳

29/08/2011
文： 蘇豪

歌仔都有得唱：「宇宙最強，間中都會受傷！」「地上最強」巴塞隆拿同樣難逃厄運，大軍防線傷停問題嚴重，後防四大天王碧基、佩奧爾、丹尼爾及艾迪安奴都唔踢得，西甲首仗於魯營主場對「黃色潛艇」維拉利爾想唔失波都幾難，巴塞勢將以攻代守，今場大細中位數改成3.5球，照捧大盤！




（now 632及635周二凌晨3時直播）




巴塞隆拿新球季仍保持王者風範，話咁快已捧走西超盃同歐超盃，勒都勒唔住。不過，巴塞後防主力碧基同艾迪安奴受傷休戰，佩奧爾手術後初愈冇態，右閘丹尼爾又要坐波監，四大天王一次過冇晒，要搵雙防中馬斯真蘭奴同布斯基斯扼守中路，雖然兩人都踢過中堅，但缺少正宗中堅始終難以予人信心。


中前場齊腳火力不減


相比之下，巴塞隆拿中前場齊腳好多，甚至出現人滿之患，中場中路塞晒車，雙膽恩尼斯達同沙維繼續拍住上，剩番個位由施度基達、法比加斯同堤亞高艾簡達拿爭餐死，不過，無論主帥哥迪奧拿派邊個落場，球隊都可採取主動控制戰局，進攻絕對唔成問題，至怕後面班友甩甩漏漏入埋唔夠輸，主Ｗ太熱唔多抵玩。




另一邊廂，維拉利爾今季人腳變動唔大，前線繼續倚重意國殺手基奧斯比羅斯爭取士哥，中場辛拿同保查華利路亦夠硬淨，戰鬥力甚強。維拉利爾作客巴塞雖會捱打，但絕對有力反擊爭取士哥，相信今場會有唔少入波，捧２倍大最好。