地頭惡霸韌力驚人 森林困死錘仔幫

猪拉多纳

28/08/2011
文： 牛奶仔

今晚英冠頭場大戰，氣勢如虹嘅諾定咸森林會喺主場出擊，迎戰剛於英聯盃出局嘅韋斯咸，有望趁對手近況低沉踩多一腳，平手盤要撐森林！（now638台周日晚上8:15直播）


韋斯咸2場失4球


韋斯咸上輪聯賽喺2度領先嘅優勢下，居然喺主場都可以畀列斯聯逼和，其後再喺英聯盃慘敗畀乙組仔艾迪索特出局，連續2場主場失威，士氣同諾定咸森林相比可謂差天共地。




「錘仔幫」今場仲有喺英聯盃領紅嘅後衞麥拿頓坐波監，雖然此子唔係必然正選，但就令領隊艾拿戴斯少咗個可靠嘅調配選擇，近2場失4球嘅後防，更反映咗厄遜離隊嘅影響，反而呢個時候「大Sam」仲由米爾頓凱恩斯簽個射手森巴鐸克返嚟，冇對症下藥，靠條脆弱後防，今晚睇怕都幾難頂得住近3戰入7球嘅主隊啦。


森林今季主場未輸過


諾定咸森林上場聯賽喺落後2球劣勢，最終連入2球逼和對手，認真韌力驚人，之後更喺英聯盃大勝韋甘比4:1晉級，士氣極為高漲。至於前鋒伊斯美米拿及芬特尼喺上輪後備入替有好表現，預料今晚會獲派正選登場，2人定會更落力爭取表現。睇番森林今季3次主場出擊都未輸過，今次平手高水絕對抵玩。