雲格揮兵奧脫福 紅魔大考驗

猪拉多纳

28/08/2011
文： 樂比堅尼

今晚英超重頭戲，曼聯喺奧脫福主場對阿仙奴，曼聯主Ｗ低到得1.42倍，係英超成立以來嘅「歷史性低位」，究竟「兵工廠」係咪咁不堪一擊，淪為英超二打六？踢完今仗自有分曉。樂比仔認為曼聯今仗可睇高一線，但賠率熱成咁唔抵玩，捧大盤更值博。（有線200及300台周日晚11時直播）




曼聯季初相當順，熱身賽全勝，社區盾反勝曼城，聯賽又二連勝，喺好多球迷心目中，曼聯好似已攞咗聯賽冠軍，但睇嘢必須長遠及宏觀一點，無可否認曼聯班小將表現遠比預期理想，但是否毫無破綻，甚至喺英超打遍無敵手，樂比仔有保留。


曼聯防線漏罅


首先，曼聯依家個陣實在太新，踢順境波嘅時候當然冇問題，但遇到逆境嘅時候，佢哋有冇足夠嘅心理質素同經驗應付，仲係未知之數，因為佢哋之前嘅賽事，仍未畀到足夠壓力「紅魔」，而阿仙奴同雲格呢個老對手，絕對有能力製造麻煩。




其次，曼聯防線仲未畀到樂比仔百分百信心，門將迪基亞偶有失手，而菲爾鍾斯及基斯史摩寧潛質甚佳，但難保唔會犯錯，計埋熱身賽及社區盾，曼聯今季九場賽事合共失咗六球，與其要曼聯贏兩粒先可以贏晒成個盤或開出「讓球主勝」，倒不如博大盤好過，因為曼聯今季九場賽事全部開大，有1.75倍確實非常吸引！


尹佩斯着晒火


好多人覺得阿仙奴冇咗拿斯尼同法比加斯之後，已唔係勁旅，但「兵工廠」從來唔係靠一個或兩個人嘅球隊，何況現有阿仙奴嘅陣容絕對唔差，上周中歐聯有波入嘅尹佩斯近期腳風一直相當順，踏入2011年後，28場正式賽事共射入24球，樂比仔相信阿仙奴有條件攻破曼聯大門。