拜仁強勢復仇

猪拉多纳

27/08/2011
文： 蘇斯黑柴

德甲頭場焦點係凱沙羅頓主場鬥拜仁慕尼黑，今日亦係拜仁上季喺同一球場輸畀凱沙嘅一周年紀念，拜仁戰將自然會加倍提高警惕，何況雙方目前實力同狀態各走極端，拜仁挾各項賽事四連勝強勢復仇，實力嚴重削弱嘅「德甲紅魔」頂唔住，捧2.15倍「讓球客勝」。（有線61及64台周六晚9時30分直播）




凱沙羅頓係德國老牌勁旅，拜仁每次對佢哋都唔敢掉以輕心，近20次交手，拜仁取得15勝4和1負佳績，但偏偏去年8月27日（德國時間）作客淨吞兩蛋，不過當日凱沙嘅入球功臣拿傑已經離隊，而拜仁今日陣容同當日比亦已經換咗半數。拜仁近期喺聯賽同歐聯合共四連勝，尤其難得嘅係至今各項賽事六戰只失一球，球隊喺軒歷基斯領導下愈踢愈有信心，今仗惟有後備殺手奧歷因傷缺陣，魔翼洛賓亦好可能養傷休息，但球隊兵源充裕，由於喺歐聯抽到下籤，要面對曼城、維拉利爾同拿玻里挑戰，當然要喺歐聯開戰前喺聯賽盡情爭勝，奠下良好基礎。


凱沙失3射手變「冇牙紅魔」


凱沙羅頓今季實力大跌Watt，上季前三名射手拿傑、莫拉域克同賀化季前相繼離隊，三人上季喺聯賽合共轟入26球，佔球隊總入球過半數，今季頂上嘅球員只有以色列射手舒捷達較為似樣，其餘蘇古達柏素、奧卡沙漢、科圖尼斯同高文夏至今都未有貨交，另一寄望甚殷嘅中場華莫夫更因傷一直長抖。佢哋今季聯賽三戰未贏過，包括主場賽和降班膽奧格斯堡，變咗「冇牙紅魔」，遇上當起班霸凶多吉少。