車仔勢炒諾域治

猪拉多纳

27/08/2011
文： 樂比堅尼

今晚英超最矚目之戰，車路士主場對「金絲雀」諾域治，車仔三名新兵盧卡古、桑馬達及奧里奧爾羅美奧有望首度亮相，樂比仔相信呢三隻「新藍精靈」可令暮氣沉沉嘅車仔起死回生，今晚車仔勢「打雀」成功，捧「讓球主勝」。（有線200及300台周六晚10時直播）




車路士開鑼兩仗演出令人失望，先被史篤城逼和，上周主場險勝西布朗二比一，但平心而論，兩戰得四分唔算係好差嘅戰果，考慮埋新帥保亞斯上任冇耐，三名新援又未披甲，相信班主阿布拉莫域仲有耐性，唔會太怪責保亞斯。




不過，車仔今仗主場對升班馬諾域治已搵唔到任何藉口，因為對手實力可能係英超最弱一隊，而且三名新兵已準備就緒，其中以西班牙攻擊中場桑馬達最受期待，從近兩仗所見，車仔最大毛病就係創造力不足，如果多咗佢同馬隆達兩隻「馬達」喺邊線游走，費蘭度托利斯、安歷卡等射手將有更多空間。


阿布唔衰得畀英國方太


事實上，樂比仔多年嚟一直不厭其煩地強調，車仔對付升班馬有一手，自阿布入主以來，車仔聯賽對升班馬踢咗四十八場從未輸過，更取得四十三勝五和佳績，當中二十四場主場射入七十二球，即係平均每場入三球，呢個數據證明咗車仔對升班馬唔單止勝算極高，仲好多波入！




諾域治開季兩場聯賽不敗，但對手只係史篤城及韋根兩支攻力薄弱球隊，英聯盃主場對甲組仔米爾頓凱恩斯都可以慘吞四蛋，可見呢隊波完全唔夠班，如果權傾朝野嘅阿布連「英國方太」呢啲師奶仔班主都贏唔到，睇怕佢日後喺上流社會畀人笑到面黃，真係贏少幾球都唔收貨呀！