波琴東瀛救兵「大」舉掃「雷」

猪拉多纳

26/08/2011
文： ComboKing

日本球員喺德國球壇愈來愈吃香，早前加盟德乙波琴嘅乾貴士，表現一鳴驚人，上仗取得入球，此子並非池中物，相信德乙只係佢爭取入豪門嘅踏腳石，未來一段日子，勢必全力表演，吸引大球會垂青。波琴今晚主場對格雷特霍夫，乾貴士隨時再有士哥，捧入球大。（周六凌晨零時開賽）




波琴今季成績大倒退，五場聯賽僅一勝，好大程度上同北韓射手鄭大世狀態低迷有關，幸好會方簽下乾貴士，呢位二十三歲中場傳射能力俱佳，相信可以提升球隊攻力，預料波琴成績可望逐漸改善，今仗有地利，起碼應該有波入。


格雷特霍夫火力猛


至於格雷特霍夫走勢凌厲，包括德國盃在內，已取得五連勝，一對前鋒奧斯恩及基斯杜化路菲合共取得八個聯賽入球，要撕開波琴防線，應該唔成問題，入球大有1.95倍值博。




另外，恩高斯達特主場對羅斯托克，羅軍跌入悶和魔咒，連續三場打和○比○，入球細屬首選。至於杜伊斯堡主場對特雷斯登，杜軍今季聯賽未開齋，冇能力讓波，捧特雷斯登「讓球客勝」。