手機apps歎直播！

猪拉多纳

26/08/2011
文： 車車

依家同朋友食飯，個個都鍾意落完單後，就即刻拎個電話出嚟篤篤篤。梗係啦，個電話咁多功能，仲係學似以前咁，淨係要嚟通話或者發短訊咁簡單咩！




今晚食消夜嗰陣，又可以繼續篤喇，隨時隨地下載個apps就可以睇到直播足球賽。有線為體貼用戶，今個月初推出「Joemud?」呢個免費apps，今晚深夜仲有場巴塞隆拿對波圖嘅歐洲超級盃直播。大家除咗可以好似平時咁喺足球台或高清201台睇直播外，亦可以試吓呢個新apps。




講開呢場波，當然順勢畀埋心水啦！我點都支持巴塞㗎喇！除咗盲目力撐韋拿，老實講，巴塞真係好弗呢！




雖然西甲延期開季，但都無損巴塞班球員心情。巴塞近五場賽事有四場開入球大，兩場西班牙超級盃對皇家馬德里都交足功課，一和一勝，上場仲大炒拿玻里五球添！


波圖攻力仲有保證


應屆歐霸盃盟主波圖都唔弱，近三場賽事全勝，但上季三冠功臣之一法卡奧已過檔馬德里體育會，隊中可以倚賴嘅只係剩番古亞連同侯克。




雖然一直都有傳佢兩個會離隊，但好在暫時表現冇影響，上季幫波圖喺聯賽入廿三球嘅侯克，今季兩場聯賽已入咗三球，所以撇除咗我偏心巴塞隆拿之外，我仲會揀埋入球大！

車車01年起在電台主持年輕人節目，05年起主持電台足球節目，10年底加入球彩台，主持《球彩俱樂部》及《球盤龍門陣》，並參與每周足球賽事直播。

phone波熱線：1831 678

電郵：soccer64@cabletv.com.hk

「球盤龍門陣」開放時間：晚上10:30至晚上11:45