紐卡素弗爆客W易「索」

猪拉多纳

25/08/2011
文： 朱楓

今晚英聯盃第2圈上演獨腳戲，由英甲斯肯索普越兩級挑戰紐卡素，朱楓相信爆冷機會極微！事關「喜鵲」啱啱贏完東北打吡士氣大振，防守仲係全英最勁，加上隊中一班二線兵都密謀爭上位，對住近況頹爆兼唔齊腳嘅斯肯索普，相信可輕鬆開1.7倍客W！（now638台及廣東體育周五凌晨2:45直播）




雖然近排受負面消息困擾，但紐卡素班球員反而愈戰愈勇，繼主場打和阿仙奴後，日前更喺東北打吡作客勇挫新特蘭，成為目前英格蘭頭4級聯賽唯一一支仍然保持清白嘅球隊，都咪話唔勁！


後備正選實力差唔多


按照慣例，紐卡素喺聯賽盃早段都會派副選應戰，朱楓賽前收到風，中場祖爾巴頓肯定缺陣，不過新簽嘅馬維奧斯就好大機會處子披甲。其實呢位「新馬隆達」近期狀態逐漸冒升，早前仲喺一場大勝業餘隊5:0嘅熱身賽中交出一個入波同2次助攻，左閘新星沙恩費格遜亦傷愈有望候命，另外前鋒丹巴巴亞同中場新星胡基斯亦好大機會擔正，雖話呢班球員平時只係後備，但其實實力同正選唔係差好遠，個個都等緊上位，朱楓預計「喜鵲」就算賽前被索察告上國際足協，話違規斟佢哋前鋒邁加，呢場亦可照樣贏波。


斯肯索普英甲都踢唔掂


綽號「鋼鐵」嘅斯肯索普，今季由英冠跌落英甲，但表現一樣咁濕滯，暫時喺英甲打咗4場得3和1負，唯一一場勝仗就係喺英聯盃第1圈作客贏阿克寧頓。雖然斯肯索普日前作客逼和查爾頓2:2，但代價就認真大，後防主力保羅萊德整傷鼠蹊，今晚極大機會缺陣，唔齊腳對住紐卡素仲想偷雞？難啲喎！