史篤城細路養成材

猪拉多纳

25/08/2011


今晚歐霸盃附加賽大把好嘢，英超史篤城「細」路已成，冇理由唔繼續追啫！球隊今晚主場鬥瑞士杜安，揸住一球優勢肯定歎慢板，杜安首回合喺自己地頭都入唔到波，作客更難破關。事實上，史篤城本季五場賽事全開細，咁嘅績唔通買大咩！（周五凌晨2時45分開賽）




於領隊佩尼斯打造下，史篤城已建立防守足球風格，冇球星唔緊要，但一班打仔踢落好齊心，防守更係滴水不漏，強如車仔都入唔到佢哋波，開咧後踢五場波僅失一粒，狀態好得不得了。史軍今季初登歐洲舞台，佩帥醒目以穩為先，上圈兩回合都贏夏德一比○過關，今圈對杜安，首回合又開一比○，今返主場分分鐘再開呢個波膽，取細盤最穩陣。


燕豪芬大開殺戒


另一場燕豪芬主場對奧地利列特，首回合兩軍互交白卷，燕豪芬目前打起狀態，上仗作客贈海牙三蛋，以佢哋豐富經驗，於主場或大開殺戒，取「讓球主勝」。而瑞典超方面，諾高平主場對佐加頓斯，兩軍近期狀態都曳，但細心睇諾高平近期主場表現算見得人，反而佐軍今季聯賽客勝率只有兩成，平手盤捧諾高平。