橫濱水手主場採櫻花

猪拉多纳

24/08/2011


搞咗成半季，橫濱水手似乎搵到套最啱用嘅戰術嘞，就係「中村俊輔『Top下固定』」，睇在呢一點分上，今日佢哋响日職主場對大阪櫻花，不妨博吓個2倍主勝。（now 634台周三晚6:30直播）




水手今日會响三澤球場出戰，呢個球場仔係佢哋常用嘅3個主場之一，但係使用量比日產球場少好多，譬如今季就只係踢過兩場聯賽一場盃賽，不過成績相當唔錯，分別贏咗新潟同山形，至於對神戶場日聯盃，就打成1:1平手，3戰不敗。


中村俊輔踢影子前鋒


其實水手主場表現相當唔曳，今季10次响地頭出擊贏咗8場。水手愈踢愈好，除咗班細嘅日漸成熟，最緊要係主帥木村和司開始識得點用中村俊輔，呢個左腳仔上場以影子前鋒角色出現，令到進攻更加流暢，射門都多咗，自不然更有本錢贏波。




大阪櫻花今季嘅演出麻麻，尤其路爾斯馬天尼斯右膝傷咗之後，隊波明顯跌Watt，4日前呢件巴西兵索性返咗祖家療傷，到下個月至歸隊，櫻花更加係群龍無首，今場波惟有希望啱啱入選南韓國家隊嘅龍門金鎮鉉，救多兩球好波，唔使輸咁多。