歐聯3.2億生死戰 阿仙奴借斯還魂

猪拉多纳

24/08/2011
文： 樂比堅尼

歐聯外圍賽附加賽次回合重頭戲，烏甸尼斯主場同阿仙奴爭價值3.2億嘅分組賽資格。阿仙奴近期頭頭碰着黑，首回合險勝烏甸一比○，好多人擔心「兵工廠」會陷入低潮，但恐慌時樂觀，向來係樂比仔菠菜哲學，難得反為阿仙奴受讓，絕對係執平貨良機，捧「讓球客勝」！（有線61及201台周四凌晨2時45分直播）




阿仙奴近期黑過墨斗，主將法比加斯及拿斯尼被挖角，接連有球員受傷及停賽，導致聯賽及歐聯連輸三個盤，連領隊雲格都被歐洲足協罰停賽兩場，今仗無緣喺後備席上督師，幾乎所有消息都對阿仙奴不利。


烏甸焗攻易輸突擊


事實上，阿仙奴始終係阿仙奴，無論幾運滯，對住意甲二流球隊烏甸尼斯仍可睇高一線。雖然阿仙奴首回合冇乜明顯優勢，射門次數甚至較烏甸少，但呢個統計數字只因阿仙奴太早領先，領隊雲格為求保住勝果，所以踢法上先較為保守，結果成功冇失作客入球，出線形勢大好，唔代表阿仙奴真係怕咗烏甸。




但今仗形勢完全唔同，因為實力較弱嘅烏甸，為爭取出線一定要主動出擊，隨時令本身已唔多穩嘅防線暴露更多空位，而烏甸失去王牌阿歷斯山齊士後，連射手迪拿達利嘅威脅力亦大減，實在難以攻破阿仙奴大門。反觀阿仙奴有尹佩斯及韋舒亞兩名主將復出，侵略性較首回合更強，依家大眾個個恐慌性跳船，阿仙奴難得受讓，唔捧等幾時呀！