士砵亭威「比」你睇

猪拉多纳

21/08/2011
文： 力奇

雷聲大、雨點小，被視為今季葡超爭標熱門嘅士砵亭，點知開咧至今連和兩場，仲只係入得一粒。不過佢哋一眾新兵其實只係有限度落場，到依家力求開齋，主帥杜明高斯再無保留餘地，強陣造訪比拉馬我捧1.62倍客勝。（有線155周一凌晨1:15直播）




士砵亭今夏積極擴軍，當中就包括巴塞小將謝法倫、西維爾快翼迪亞高卡普同保加利亞國腳保積洛夫等。雖則話人腳強勁，不過主帥杜明高斯懶係不變應萬變咁，首周對住弱旅奧漢倫斯，上述三人都冇個係主力，保積洛夫更連後備名單都冇，直到比賽中段落後一球，先至話換番入班新人轉打「424」陣式強攻，咁樣至可以和波收場。


比拉馬上季排尾4


上周中歐霸盃對住丹麥球隊洛斯查蘭特，士砵亭再一次互交白卷，陣容上又係再一次無放新買球星打正選，為求開齋力奇有信心佢哋今仗會精銳盡出，對住上季只係排尾4嘅比拉馬，仲點會失分吖？