葡超頭號星工廠

猪拉多纳

21/08/2011
文： FuFu

波圖前鋒法卡奧日前打破馬德里體育會轉會費紀錄，以四千萬歐元加盟呢支西甲勁旅，雖然FuFu一向非常欣賞呢位哥倫比亞頭槌王，但馬體會賣阿古路畀曼城都只係三千八百萬歐元，須知道除頭槌外，法卡奧無論速度及把握力都不及阿古路，馬體會撳唔到曼城之餘，仲畀波圖當水魚，高層決策的無能，正係呢支「西甲三哥」近年被華倫、維拉利爾及西維爾等趕過頭的主因。




相反波圖真係頂呱呱，呢支葡超勁旅近年成為世界球壇頭號大商家，創造多宗低買高賣交易，法卡奧之前，就有魯爾梅利斯及利辛度盧比斯等，最難能可貴係場上成績得以保持。其宿敵賓菲加亦不遑多讓，大衞雷斯、法比奧干查奧、拉美利斯、迪馬利亞等亦係重磅交易，可見葡超已成世界球壇頭號星工廠。




講到星工廠，上代最成功一定係荷蘭阿積士，可惜自雲達華治及史奈達後便無以為繼，蘇亞雷斯算係近年最成功例子，不過阿積士最可愛之處係咁多年都不改主攻踢法，絕對係FuFu長捧大盤的佳品。


阿積士大盤沒法擋


今晚阿積士作客芬洛又係捧大盤時候，事關阿積士攻力非常對辦，先後大勝迪加史卓普及海倫芬之餘，後防又奉旨失番粒畀對手，就連馬會開出入球中位數3.5球多數開細嘅魔咒都畀阿積士打破，就知大盤沒法擋啦！（now 639周日晚8時30分直播）