|
16/08/2011
文: 走肖
「未知」永遠係最恐怖嘅,哥本哈根今晚喺歐聯附加賽首回合主場對柏辛域陀尼亞,就要面對未知嘅挑戰,雖然柏辛域陀尼亞上季至首次攞到捷克頂級聯賽冠軍,但佢哋踢法神秘潛力未見底,今屆歐聯外圍賽連洛辛堡都輕易摧毀,「讓球客勝」有2.3倍博得過。(有線63及203周三凌晨2:45直播)
淘汰洛辛堡唔係嘢小
哥本哈根係上季丹麥聯賽冠軍,講名氣當然贏成條街,但佢哋有中場干查退役,中場基斯特被高價出售到史特加,話實力冇削弱就呃你,即使有莫迪首席射手柏比迪奧夫加盟,都唔值得睇太高。上屆哥本哈根入到歐聯16強,唔代表今屆佢哋照樣有好表現,捧之前記得諗清楚。
對家方面,柏辛域陀尼亞當然冇咩人識,因為佢哋02/03年球季至首次贏到捷克次級聯賽錦標,前屆成為捷克盃冠軍後,出戰歐霸盃兩回合計更加以1:4慘負比錫達斯,表面睇好似冇乜料到,容易被忽視。
不過咁,今屆歐聯外圍賽柏辛域陀尼亞4戰全勝,包括兩回合計以4:2淘汰洛辛堡,首席射手尼斯克係現役捷克國腳,唔易恰o架。
|
|