|
14/08/2011
文: 走肖
新潟天鵝今午日職主場鬥浦和紅鑽,平手都冇着數!賽前紅鑽教練施里積高柏杜域大發牢騷,埋怨日本U22集訓時間長影響佢備戰,嬲到落柯打話今場一定要踢爭氣波攞晒3分,紅鑽近10次對賽不敗可捧。(now633台周日下午5:00直播)
紅鑽今季實行年輕化,上星期有4個球員參加日本國家隊集訓,搞到備戰不足以2:3不敵神戶勝利船,點知今個星期又有4個球員入選日本U22,激到施里積高柏杜域勁嬲,所以佢同東瀛傳媒講,今場波佢哋一定要贏波反彈,加上被日本U22徵召期間受傷嘅翼鋒原口元氣,證實傷愈可以落場,紅鑽咁重殺氣,即使中場馬斯奧李察士停賽都冇有怕。
天鵝近10次對賽輸到驚
至於連贏3場兼冇失波嘅天鵝,狀態同信心明顯有所提升,不過自06年起,天鵝對紅鑽得2和8負未贏過,簡直被對方恰到上頭頂,日本傳媒更加形容紅鑽係佢哋嘅「天敵」,最近天鵝放走不受重用嘅前鋒大島秀夫同後衞大野和成,實際影響唔算大,但睇得出佢哋高層滿足於現時中游位置,冇諗過副選球員離隊可能影響教練黑崎久志調動,Hea住踢要唔過。
|
|