|
13/08/2011
文: 張志德
大家好,新一季英超又打到嚟,細鬼好高興又可以同讀者傾傾波經。雖然放暑假,但細鬼一啲都冇偷懶,早前喺香港舉行嘅巴克萊亞洲錦標賽,有三大英超勁旅車路士、阿士東維拉同布力般流浪來港,我梗係有去捧場,英超隊伍備戰認真,落場絕冇揸流攤。
麥利殊作風保守
大眾球迷幾乎將焦點一致集中於車仔身上,但其實維拉亦有好多看點,其中新一代英格蘭前鋒戴倫賓特,於前線拍住老牌射手希斯基威力強勁,可惜艾邦拉荷始終打唔出前兩季嘅高水準,而季前又放走咗艾舒利楊格同達寧,雖然補入尼索比亞,但整體實力的確削弱咗。
維拉新領隊麥利殊,係個保守派領隊,新官上任相信都會以穩陣行先,今晚佢哋開咧作客富咸,唔會搶W,和波機會好高,另細盤亦值得瞄實。(有線204及304台周六晚10時直播)
|
|