富咸主場勁到離「普」

猪拉多纳

04/08/2011
文： 朱楓

今晚歐霸盃上演第3圈外圍賽次回合，其中富咸會返主場鬥施普列特。首回合富咸贏唔到，可以話全因球場質素太曳，相信今場返番自己地頭表現會脫胎換骨，加上有主力丹普西復出，近日又頻頻傳想買人，似乎有心行得更遠。朱楓睇好富咸今場可以輕鬆贏波，開出1.52倍「讓球主勝」！（開賽時間：周五凌晨2:30）




首回合富咸作客施普列特，本來被認為可以輕鬆贏波，點知全場被對手㩒住嚟砌，好彩最後都頂得住，成功逼和對手0:0。雖然首仗表現令人失望，但富咸後防拜阿迪賽後就話球隊之所以表現咁曳，全因對手球場實在太爛，影響發揮，相信今晚返番自己地頭表現會有改善，有信心贏波出線。其實睇番富咸之前兩圈主場賽事，表現的確比作客好好多，先後以3:0同4:0大勝NSI魯納維克同十字軍，地頭威力絕對唔講得笑。


富咸傳增兵有鬥心


賽前朱楓仲八到好料，就係上回合冇隨隊嘅前鋒迪比利同中場丹普西，都已經操番弗今晚可以候命，肯定對富咸有幫助。何況佢哋近排傳出想簽伯明翰前鋒謝路美，又話想買海牙孖寶華賀克同恩馬斯，擺明準備打歐霸盃分組賽，試問今場又點會甩拖？


施普列特經驗輸晒


至於施普列特方面，前面都有講過，其實呢支克羅地亞球隊首仗表現唔曳，可惜欠臨門一腳，最後贏唔到，大有放虎歸山味道，畢竟今屆先係施普列特首次征戰歐洲賽，今晚首次出國作客，唔驚就假，輸兩粒當交學費啦！