|
31/07/2011
文: Mic少
今晚繼續上演季前熱身賽酋長盃,尾場阿仙奴主場對紐約紅牛,焦點當然係兵工廠一代名將亨利率領紅牛倒戈!時至今日「廠迷」仍視呢位法國射手為英雄,熱烈歡迎佢回歸,相信阿仙奴球員亦會識做,畀亨利盡情表演爭取入波,預料今仗會係一場鬥攻好戲,捧入球大。(now 633周日晚11時20分直播)
亨利球員生涯最光輝時期幾乎都喺阿仙奴度過,為兵工廠奪得兩次英超及三次足總盃冠軍,亦係阿仙奴史上入球最多球員,堪稱「槍王」。球迷當佢神咁拜,亨利今次重返阿聯酋航空球場,等同回到自己屋企,心情非常興奮,當然會使出渾身解數,全力以赴畀球迷再次睇到佢昔日風采。至於一班阿仙奴師弟應會畀面,盡量腳下留情,讓亨利入波攞彩。
紅牛攻力冠美職
另一方面,阿仙奴一向踢進攻足球,今夏簽下科特迪瓦射手謝雲奴之後,大大增強鋒線衝擊力,令進攻瓣數更多,今場要入波並唔難。至於紅牛係今季美職攻力最強球隊,兩支主攻球隊交手,相信屆時應有大量入波鏡頭出現。
頭場小保加對巴黎聖日耳門,兩軍同樣以試陣為主,唔會太在乎勝負,球員可以放開懷抱比賽,有利製造入球,大盤同樣可取。(now 633周日晚9時直播)
酋長盃賽制:贏波三分、和波一分及落敗冇分。若分數相同的話,則順序以下列條件決定排名︰1.得失球差、2.入球數字、3.射中目標次數,如未能分出高低,兩支或以上球隊齊捧盃。 |
|