|
06/07/2011
阿根廷首場分組賽對玻利維亞表現令人失望,但領隊巴迪斯達拒絕變陣出擊,佢話會以上場陣容為班底,只會以薩巴列達代替馬高斯盧祖上陣,其餘陣容不變,連上場入波嘅阿古路都要繼續坐冷板!
阿根廷今次踢美洲國家盃,徵召咗美斯、泰維斯、拿維斯、阿古路、希古恩及迪亞高米列圖六大前鋒,但正選上陣嘅只得三人,上場三位正選都冇料到,外界自然有好多聲音,希望巴迪斯達畀機會其他人。
不過巴迪斯達唔係咁諗:「我要保持陣容嘅穩定性,唔想場場換人,咁對球隊係百害而無一利,美斯亦要習慣角色轉變,我希望佢可以踢正前鋒,為球隊爭取入球。阿古路上場踢得好好,但佢要再畀啲耐性,適當時候我會用佢。」
巴迪斯達話今場唯一變動係薩巴列達正選上陣,而上場踢右閘嘅老大哥辛尼迪,則會移任左閘。
|
|