墨西哥大執位智利有計

猪拉多纳

04/07/2011
文： 亨格比利

呢頭贏完美洲金盃，轉頭就畀人踢爆8位國腳喺酒店嫖妓，墨西哥國家隊呢期都算爆囉！呢支美洲國家盃邀請隊今次派大量生牯仔掛帥，大賽經驗欠奉唔似會有作為，聽朝喺C組對住智利隨時輸鑊勁，捧2.4倍「讓球主勝」。（有線61及201、中央5台周二早上8:45直播）




捧走金盃之後，墨西哥放走晒查維亞靴南迪斯同古亞達度等主將，以奧運腳擔大旗，陣容大執位之餘，最弊係以約拿芬杜斯山度士為首嘅8位「嫖客」被逐咗出隊，戰鬥力肯定弱上加弱，負責喺美洲盃領軍嘅助教坦拿唔頭痕就假咯！


智利以世盃班底做骨幹


墨西哥除10號仔杜斯山度士有啲卡士之外，經驗最老到嗰個，已經要數到擁有16頂喼帽嘅保羅阿古拿，成隊總共有9位國家隊新丁，嚟到美洲盃呢個大舞台隨時腳軟。




相反智利領隊波基就揀咗大批球星，除咗南非世盃防線骨幹干沙路查拉、柏保路干查拉斯同龐斯之外，仲有馬迪亞斯費南迪斯、維達爾同阿歷斯山齊士幾位猛將，默契、狀態同戰鬥力都贏墨西哥成條街。而且接掌國家隊4個月嘅波基決定用番舊帥比爾沙套進攻足球戰術，以不變應萬變，睇怕墨西哥都係凶多吉少。


美洲國家盃賽制


12支球隊分3組踢單循環賽，每組首兩名及兩隊最佳成績第3名躋身8強淘汰賽。