澳門作客越南勢現形

猪拉多纳

29/06/2011


今日會上演多場世界盃亞洲區第一圈外圍賽首回合，香港有幸於首圈輪空，直至第二圈先加入，但其實首圈亦有唔少具實力球隊，例如越南同馬來西亞，最值得留意係馬來西亞主場對中華台北，中華台北特別徵召咗喺比利時聯賽搵食嘅陳昌源歸隊，希望可爭取好成績。


中華台北氹掂比甲猛將


今年二十七歲嘅陳昌源効力比甲梅赫倫，曾入選比利時青年軍，年薪高達七十萬歐元，由於佢爸爸係台灣人，經中華台北隊幾經游說後，終決定代表中華台北出戰世盃外圍賽。據講佢證件未搞掂，首回合未必踢得，可能喺次回合先上陣。除陳昌源外，另一位被關注球員係周子軒，呢位喺西班牙馬德里出生球員目前効力西乙球會沙拉曼卡青年軍。




另一場越南主場對澳門，相信越南可輕鬆擊敗對手晉級，雖然澳門喺早前嘅港澳埠際賽以一比○擊敗香港捧盃，但嗰支港隊只係U21，大部分都欠缺比賽經驗，所以澳門贏波不足為奇，今場作客實力強勁嘅越南隨時大敗一場！