山度士彭拿路好均細

魑魅魍魉

22/06/2011
文： Mic少

南美自由盃決賽次回合，巴西山度士主場鬥烏拉圭彭拿路，雙方首回合打和○比○，意味今仗一切重新開始，大家都毋須着急，最重要係唔好犯錯，否則冇仇報。事實上，兩軍皆非搶攻型球隊，山度士近七場自由盃有六場開細，1.78倍嘅入球細好值博。 （有線61台周四早上8時50分直播）


尼馬近期腳風唔順


足球比賽負方往往唔係喺戰技上輸畀對手，而係自己出錯累事，來到終極一戰，一次犯錯足以致命，因此決賽雙方都會特別謹慎。山度士可以打入今屆決賽，就係靠穩陣戰術，只求晉級，唔理是否踢得漂亮，即使主場出擊亦唔例外，佢哋踏入淘汰賽後三場主場都開細，兩場小勝一比○，一場打和一比一，可見山度士即使有地利，亦唔會太冒進。




值得一提係山度士射手尼馬獲得多間大球會垂青，好可能短期內去歐洲搵食，或會令呢位後生仔精神集中力受影響，佢近期腳風亦唔順，削減球隊數胡能力。


決賽不設作客入球優惠


彭拿路首回合主場不勝，可謂放虎歸山，今次作客巴西，更加難以奢望可以贏。球隊近期狀態麻麻，近八場賽事僅一勝，近兩仗更冇波入，相信佢哋自己知自己事，唔會同山度士硬碰，應會採取穩守突擊，等待對手出現漏洞，再施偷襲。




由於自由盃決賽唔計作客入球優惠，亦會減低彭拿路爭取入球嘅誘因。如果兩回合總比數打和，會加時三十分鐘，加時再和，就互射十二碼分勝負。