急流戰意旺盛沖散銀河

魑魅魍魉

18/06/2011
文： 亨格比利

美職聽朝激戰連場，科羅拉多急流會喺主場恭候洛杉磯銀河。齋睇牌面當然以銀河秤先，之不過急流近況亦唔曳，陣中一對牙買加「孖寶」泰朗馬素爾同埋奧馬甘明斯，更加連美洲金盃都唔踢，寧願留低搏殺，戰意旺盛要砌低銀河唔係天方夜譚，平手盤要急流。（開賽時間：周日早上9:00）


牙買加孖寶棄戰金盃


有份入選牙買加國家隊嘅後衞泰朗馬素爾同前鋒奧馬甘明斯，日前拒絕出戰金盃，點都要留低幫急流搏殺，對士氣起到振奮作用。況且急流自4月底輸完畀海灣者之後，已經連續9場波未輸過，狀態弗到震。




雖然話急流今戰有中場白賴仁梅蘭停賽，戴夫岩士唐同前鋒簡迪積又養緊傷，但對家銀河亦唔好得幾多，皆因門將當奴雲歷格斯同隊長當路雲都因為出戰金盃缺陣，教練艾連拿都批評隊波創造力不足，單靠今季交出7次助攻嘅碧咸難保至尊，寧博戰意十足嘅急流好過。