聖荷西「雙S」震散肯薩斯

港陌

17/06/2011
文： 朱楓

雖然聖荷西地震近排有射手雲度路斯基缺陣，點知反而捧紅咗前鋒連赫特同中場西蒙戴堅斯呢對「雙S」孖寶，聽朝喺美職獨腳戲作客冇咗半打主力嘅肯薩斯體育會，絕對有力乘勝追擊，1.9倍「讓球客勝」抵玩！（開賽時間：周六早上8:30）




地震雖有暫以6球排射手榜第3位嘅前鋒雲度路斯基同賴恩莊遜踢金盃缺陣，但班波仍保持水準，連同盃賽已保持8場不敗，當中前鋒連赫特（Steven Lenhart）同由熱刺外借嘅中場西蒙戴堅斯（Simon Dawkins）可謂功勞最大，事關兩人竟包辦球隊近兩場6個入波，地震今場繼續有呢對「雙S」孭飛，肯定有運行。


肯薩斯冇半隊主力


肯薩斯早前因新主場未起好，結果頭10場美職都要作客，直至本月11號先喺主場對芝加哥火燄，可惜喺全場爆滿下仍悶和0:0，點知上場作客FC達拉斯，卻突然大勝對手4:1，真係估佢唔到。不過朱楓相信呢支目前美職包尾球隊聽朝對住地震好難再創奇迹，事關中場洛卡素、羅渣艾斯賓路沙、奧維利同後衞沙法湯馬士齊齊因踢金盃未返，中場史杜捷斯夫又停賽，加埋墨西哥老牌射手奧馬巴禾、中場賴恩史密夫同干拉特華斯查又上陣成疑，陣容殘到咁，破到蛋都偷笑啦！