開季三連勝 中秋前例贏沈集成旺勢比你高

猪拉多纳

星期四係中秋節，今年由於要遷就大坑舞火龍（周三至周五）嘅警力調動，連快活谷夜馬都要提早一晚上演，相信唔多唔少都會為大家帶來不便，不過始終今次撞啱佳節當前，相信馬迷都唔介意讓路。
       
比你高
熱完身即增程，擺出一副搏殺格。

數今個季初當旺騎練，呢輪勢如破竹嘅沈集成就真係着晒火，開季三期賽事次次都有馬贏，難得個頭開得咁靚，當然希望食住個浪，有風駛盡啦！唔講唔知，原來成哥近兩季喺中秋節前夕賽事例有頭馬見面，2011年憑「厲行星」先拔頭籌，上季就有「喜欣賞」順利建功，睇怕以佢今晚呢手參賽馬，都好大機會再下一城。
       
較啱火候至增程

第四場上陣嘅「比你高」，上星期啱啱至跑完谷草1200米，今次匆匆增程角逐一哩，無非都係希望等隻馬開咗氣熱夠身至起手搶攻。成哥季前招呼咗「比你高」馬主之一曹眺航同騎師田泰安出席馬房聚餐，仲專程拉埋兩人齊齊去馬格，一邊睇馬一邊講解部署，論誠意真係做足一百分！練者話明「比你高」大咗一歲，脾氣收斂之餘，情緒又集中咗，今季應該係時候收成，呢場較啱火候谷起狀態，卒之決定增程出擊，陣上如果發揮順利，餐士的確唔細！