雙核回歸心跳摧「花」

猪拉多纳

24/12/2011
文： 走肖

天皇盃4場8強戰今日連環爆發，由於冠軍獎品包括下屆亞冠盃入場券，大阪櫻花今日喺主場對清水心跳難免打甩髀，呢場波心跳有「雙核」小野伸二同龍格保傷愈復出，擺明要搏殺，龍格保仲拍心口話要爭取「人生初」平安夜勝利，心跳「小龍出海」受讓平半抵捧！（開賽時間：周六中午12:00）




櫻花上一圈以互射12碼淘汰仙台維加泰，過程相當驚險，主要原因係前鋒法比奧盧比斯同中場路爾斯馬天尼斯，經已返咗巴西搵班落，加上教練古爾比決定唔續約，唔齊腳又士氣曳，表現點會好？仲有呀，消息話櫻花新王牌清武弘嗣即將轉會紐倫堡，相信佢哋啲球員好難集中精神踢天皇盃。


教練離隊傳聞粉碎


由於南韓國家隊已請咗全北汽車教頭崔康熙執教，意味清水心跳教頭高迪比離隊傳聞告一段落，更重要係，曾經長時間効力阿仙奴嘅中場龍格保，日前由瑞典養好傷趕返日本為心跳助陣，佢話職業生涯從未試過平安夜比賽，今次要把握機會試吓至得喎，粉絲可以放心。


心跳近兩屆都殺入4強


至於心跳另一主將小野伸二，據講都可以傷愈復出喺中場派牌，至於今季有8個聯賽入球嘅前鋒高原直泰更加話，必定會搏盡入波，務求心跳能夠連續3年殺入天皇盃4強，淨係睇賽前動態，明眼人都睇得出心跳有火得多，中場小林大悟同後衞兒玉新養傷唔係大問題。


天皇盃賽制


今輪為8強戰，以一場過分勝負，若法定時間內打成平手，則需加時作賽，再和則互射12碼決勝。