紐卡素搵西布朗祭旗

猪拉多纳

21/12/2011
文： Wendy

北韓領導人過身，當地官台個資深女主播「哭腔」報道，播出嚟嘅畫面亦見到啲人民喊到豬頭咁，呢個情況，就好似紐卡素上周末狂攻之下，都唔能夠攻破史雲斯大門時，球隊上下個喊樣仲慘過啲北韓人民。


至於最慘嗰個梗係前鋒丹巴巴亞喇！作為紐卡素首席射手擔起入波重任，可惜又中楣又被對方門將撲出多個必入球後，始終冇進帳。

西布朗連續作客體力輸蝕

今晚英超將會展開聖誕前一輪比賽，「喜鵲」主場出擊對西布朗，相信一定會將上一場嘅怨氣喺今晚一次過爆發。事實上，紐卡素季初聯賽十一場不敗，直至喺對曼城嗰場開始嘅地獄賽程，先至連環失分，今季「喜鵲」主場出擊係信心保證，只曾輸過畀車路士，講技術一定高過西布朗。


主隊唯一隱憂係後防大將史提芬泰萊繼續養傷，好在紐卡素呢兩輪所對嘅球隊都唔強，「拆禮物日」都只係對已見降班格嘅保頓，呢段「快車」賽程都算舒服。


西布朗剛剛作客贏完布力般流浪，但今晚又作客，連續兩場出征加上係快車期，體力上蝕底啲。佢哋過去七次去「聖占士」都贏唔到，難怪全世界大多開出西布朗受讓半球，盤路算合理。照咁睇，呢場一於揀「喜鵲」可以展翅搶W，全取三分！


（有線303及203台周四凌晨3時45分直播）

曼城「讓球勝」有暗湧

另外，今晚大家可能會將注碼投放到曼城「讓球主勝」，不過留意每年嘅快車期都有熱門球隊失手，大家小注怡情好喇！