「盤王」華倫西恩斯搵里昂着數

猪拉多纳

21/12/2011
文： 郭球奇

究竟今季法甲主場「讓球主客和」贏盤第3多係邊支球隊？巴黎聖日耳門？里爾？聖伊天？通通唔係！答案竟然係尾二嘅華倫西恩斯！今晚呢支地頭龍主場出擊迎戰里昂，梗係捧1.53倍「讓球主勝」啦！（now714台周四凌晨2:00直播）


開季主場僅輸1仗


華倫西恩斯暫時以17分排法甲尾二，睇落成績好似好曳，實情主場勁到爆，開季至今只係輸過一場咁大把，里爾、馬賽兩大勁旅作客華倫西恩斯都只係和波收場，「一哥」蒙彼利埃嚟到更加係失晒3分，難怪單計「讓球主客和」，華倫西恩斯目前法甲主場贏盤率第3高球隊，今晚主場出擊，睇嚟又係搶分護級好時機。




對家里昂早前喺歐聯大勝奇迹出線，但返到法甲，對上兩場都只能小勝羅連安特同伊維恩，完全冇晒早幾年場場輕取對手嗰份霸氣，今晚作客華倫西恩斯絕對唔係穩勝，更何況呢支褪色勁旅今場仲有中場新星加連尼亞停賽，左路天王米高巴斯圖斯又因傷未必踢得，再睇埋佢哋近6次作客華倫西恩斯只得1勝3和2負嚟睇，讓波認真牙煙！