烏甸夠料破祖記不敗

猪拉多纳

21/12/2011
文： 查理阿蛋

各位球迷今晚記得黐實部電視啦，除咗較後時間有一連串英超賽事，之前仲有意甲榜首大戰，由烏甸尼斯迎戰「一哥」祖雲達斯！「斑馬軍團」係歐洲四大聯賽嘅唯一不敗之師，不過今次造訪主場超勁嘅烏甸就極有可能被破金身，平手盤小妹一於捧高水嘅主隊。（now633、660台及中央5台周四凌晨1:00直播）




無可否認，今季全面復興嘅祖雲達斯既有名宿干地領軍，更有派路、維達爾及馬治斯奧組成嘅黃金中場線，學足巴塞咁大踢漂亮足球，係就係幾有冠軍相，可惜作客就死晒火，話就話不敗，其實作客7場有4場和，即使面對今季戰績一般嘅羅馬、基爾禾、卡坦尼亞亦未能取勝，今仗作客烏甸尼斯，可以話係繼拿玻里之後最大嘅考驗，話晒烏甸今季聯賽喺費奴利球場7戰全勝、只失2球，戰績冠絕意甲，小妹就唔睇好祖雲達斯可以全身而退喇。


迪拿達利地頭例有波入


烏甸尼斯得以令費奴利球場變成「地獄」，除咗極為硬淨嘅防守之外，仲要多得神射手迪拿達利，呢位34歲嘅老將今季聯賽7戰主場全部有波入，狀態弗到漏，進攻中場比斯亦喺上仗對拉素成功開齋，佢好興奮咁話：「我願意為烏甸付出所有！我哋冇咩包袱，所以會繼續大踢進攻足球！」比斯絕對唔係大口氣，有佢拍住迪拿達利及伊斯拿，相信祖記今次不敗金身都難保喇！