盃賽專家史浩克「遜」得過

猪拉多纳

21/12/2011
文： 亨格比利

今晚繼續有德國盃玩，兩支聯賽前列分子慕遜加柏同史浩克04將正面對撼。史浩克話晒係衞冕，最近更贏到開巷，加上今季喺盃賽出擊特別醒神，今仗即使作客都可以秤高少少，受讓梗係值得捧場啦，要1.55倍「讓球客勝」。（無綫翡翠台周四凌晨3:30直播）




德國盃嚟到第3圈已經連場硬仗，最矚目當然係新季起飛嘅慕遜加柏硬撼史浩克啦！計埋歐霸盃在內，去屆德國盃盟主史浩克最近錄得5連勝，魯爾同亨特拉爾合力轟入8球，腳風順成咁，問你驚唔驚？最重要係史浩克踢盃賽有一手，今季6場歐霸盃分組賽同兩場德國盃都未輸過，總共攞到6勝2和佳績，正式係「盃賽專家」。


慕遜加柏上圈靠12碼挫弱旅


主隊慕遜加柏今季起飛，砌低拜仁、大炒「狼堡」同不來梅呢幾場波都係代表作，但新星馬高列奧斯最近飽受傷患困擾，直至上場先至復出，難怪隊波最近試過失分畀奧格斯堡、對住下游嘅緬恩斯亦只係險勝1粒。睇番晉級過程，佢哋上一圈對住低組別嘅海登威贏得好牙煙，最尾要靠互射12碼先晉到級，今鋪碰到史浩克冇咁好彩o架嘞！


德盃、荷盃及葡盃賽制：


德盃及荷盃為16強，葡盃為8強戰，以一場過分勝負，若法定時間內打成平手，則需加時作賽，再和則互射12碼決勝。


西盃賽制：


採主客兩回合淘汰制，今輪為32強次回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。