阿仙奴撼維拉好「大」鑊

猪拉多纳

21/12/2011
文： 走肖

阿士東維拉今晚喺英超主場對阿仙奴，入球大最抵捧，事關維拉兩大射手戴倫賓特同艾邦拉荷復出，對住有佐羅傷埋，焗住用中堅打邊嘅「傷兵工廠」阿仙奴，唔憂冇波入，更何況兩隊近年對賽慣開今場有1.7倍嘅入球大，臨近聖誕冇理由踢悶波趕客啫。（有線202及302周四凌晨3:45直播）




維拉近5場聯賽得1勝1和3負，近況唔多掂，好在上場缺陣嘅戴倫賓特同艾邦拉荷，分別經過養傷同停賽後可以同時復出，當中戴倫賓特喺維拉淨吞利物浦兩蛋嘅比賽因傷避戰，但就走去購物，結果當然被狂鬧，呢場難免要踢爭氣波，而且戴倫賓特同艾邦拉荷今季分別有5個聯賽入球，攻入阿仙奴唔奇喎！


維拉雙箭頭復出


對家方面，兵工廠唔知係咪軍醫太渣，今季依然不斷出產傷兵，絕對稱得上係「傷兵工廠」。日前佢哋以0:1不敵曼城，更加有佐羅下半場傷出，需要用新仔伊格拿斯米基爾頂檔，令到後防更加兒戲，加上閘位球員包括沙格拿、贊堅臣、安德里山度士同基蘭基比斯未好番，預料領隊雲格要繼續用中堅客串打邊後衞，加上阿仙奴本身條防線已經唔係好穩陣，照咁睇好難唔失波。


阿仙奴桑治停賽


更弊嘅係，阿仙奴中場較為硬淨嘅桑治，今場都要停賽，冇埋佢喺中場掃蕩，防線壓力難免加重，除非門將施捷斯尼有超水準演出，否則以兵工廠現時嘅陣容，失波好正常。既然守唔住，要搶分自然要以攻代守，暫時以15球領先射手榜嘅隊長尹佩斯，係時候再入波延續兩隊近5次對賽4次開大走勢。