哨牙蘇黑到爆紅軍行衰運「根」唔過

猪拉多纳

21/12/2011
文： 朱楓

力追前四嘅利物浦，今晚英超作客韋根隨時又令球迷失望，皆因紅軍一向遇強愈強，遇弱愈弱，射手蘇亞雷斯啱啱又榮升「第一柱男」，作客近況唔曳嘅韋根，朱楓寧捧2.45倍「讓球主勝」！（有線204及304周四凌晨4:00直播）




韋根回勇交手唔輸蝕




利物浦上場作客輕取維拉錄得兩連勝，賽後升上第6，落後第4位嘅車路士僅3分，今晚作客下游球隊韋根，相信好多人都睇好紅軍可以再下一城。不過朱楓就唔係咁睇，一來紅軍今季對住下游球隊仍然成日失準，主場已先後被史雲斯同諾域治兩支升班球隊逼和，作客更加輸過畀富咸，而且「哨牙蘇」蘇亞雷斯黑到爆，啱啱榮升今季英超中柱中楣次數（5次）最多球員，中場史比寧又繼續坐波監，真係唔係穩贏o架！




早前曾9連敗嘅韋根，近況明顯好轉，對上5場取得2勝2和1負，上仗主場更逼和爭標球隊車路士1:1，當中中場祖迪高美斯喺呢5場波更勁入4球，狀態弗到爆，今晚有力再嚇利物浦一跳，再睇埋韋根近年主場對利物浦取得1勝2和佳績，要保不敗又有幾難？