雙城戰爆入球騷

猪拉多纳

21/12/2011
文： KIT

英超聖誕快車殺到！雖然喺英超帶緊頭嘅曼城，响聖誕快車嘅對手都唔算太強，而且全世界都知，領隊文仙尼手頭上班球星足以排出兩隊，人人都夠料踢正選。不過曼城今晚主場對住近期回勇、聯賽已經4連勝嘅史篤城，小妹反而覺得個主勝唔算十拿九穩，所以今場都係捧1.43倍入球大好過！（有線200及300、廣東體育周四凌晨3:45直播）




大部分歐洲聯賽嘅球員都有得放假賀聖誕，但英超嗰班無得抖之餘仲要加班。「英超快車」今個周中展開，未來2星期要踢足4輪，對體能真係極大考驗！呢個非常時期，各隊教頭肯定各有考慮，大家投X前最好都係等埋開波前個出場陣容，睇定啲先出擊呀！


史篤城傳中一樣有料到


最近好多球迷都有幻想，話要對付「地上最強」嘅巴塞隆拿，唯一可能就係史篤城！無錯，史篤城嘅手榴彈真係震驚天下，只要梳頓同戴納將個波掟入禁區，再加埋史篤城班高佬配合，一場混戰就會喺小禁區發生，所以無論對手係巴塞抑或曼城，隨時都會畀史篤城球員甚至自己友擺老烏撞入！




雖然英格蘭足總開始覺得唔多妥，或者會禁止佢哋再用毛巾抹乾淨個波先掟界外球，但總之呢招今晚仲用得，無論門將赫特有幾好身手，曼城後防都隨時有難！當然史篤城都唔止呢一招啦！佢哋最近左右路出波畀中間班高佬去頂，都有唔少斬獲o架！


曼城近5戰入10球


真係講講吓都有啲戥曼城擔心，唔通快車一開佢哋部列車就出軌？無咁易嘅！畢竟曼城中前場星光熠熠，火力十足，仲要呢排巴洛迪利同阿古路都踢得咁好，佢哋近5場入咗10球攻力咁勁，而史篤城嘅手榴彈亦隨時炸出血路，今晚肯定打得激，一於捧入球大啦！