烏甸無敵主場劏祖記

猪拉多纳

21/12/2011
文： 巨高

聖誕長假期前最後一輪意甲，其中佔主場之利嘅烏甸尼斯，與祖雲達斯將上演榜首大戰。烏甸尼斯今季聯賽七次主場全數勝出之外，失球數字亦相當低，可見費奴利球場對於烏甸尼斯有幾大幫助，烏軍為求升上榜首，今場勢必付出所有，以打破「斑馬兵團」祖雲達斯不敗之身，平手盤可捧主隊。




現時意甲榜首形勢，祖雲達斯33分排榜首，烏甸只落後2分。其實祖雲達斯與烏甸尼斯關係非比尋常，兩隊經常有交易，好似現時効力祖雲達斯嘅伊亞昆達、馬高莫達、加利亞雷拉及柏比，以前都隸屬烏甸，另外，今年暑期「斑馬軍團」曾斟介射手迪拿達利，烏甸管理層亦已「開綠燈」，但因迪拿達利唔想走令到交易告吹。呢兩班波向來都有偈傾，只要你肯賣好球員，祖雲達斯亦唔會虧待你，今場「放分」畀主隊絕唔覺得奇怪。


迪拿達利為入意軍搏殺


另外，烏甸老將迪拿達利已經多次向意大利領隊柏蘭迪利表示，自己仍能喺國際賽大放光芒，仲會以入球證明戰力未減。邊緣國腳為入選國家隊而拚盡，鬥志一定強過祖雲達斯嗰班慣常國腳，今場榜首大戰一定有料到。




再講，祖雲達斯客場表現唔叻，近兩次作客拿玻里及羅馬都失分，今晚對住主場惡氣十足嘅烏甸尼斯就更難睇好。另外黑山外援胡仙歷仍未康復，前場只得番馬特尼一個，攻力必定受影響，要贏主隊有難度。