82年來最威聖誕

猪拉多纳

21/12/2011


由文仙尼所帶領嘅曼城，距離八十二年塵封紀錄只差一步！基於曼城仍以兩分優勢領先曼聯，得失球又比曼聯較佳，故此今場只要唔輸畀史篤城，球隊就能繼1929年後，首次以榜首身份進入聖誕佳節，對於挑戰聯賽冠軍嘅曼城絕對好消息。雖話一分已足，但曼城必以贏波為目標。連同所有盃賽及聯賽，曼城近九次主場獲得全勝，如果今次贏埋史篤城就真係「十全十美」。




文仙尼睇中拿維斯




要長期保持競爭力，球隊當然要不停注入新血，而有充裕資金支持嘅曼城，好有機會喺一月轉會市場入貨，據英國《每日郵報》所述，曼城有意從拿玻里引入阿根廷前鋒拿維斯。早前歐聯分組賽，拿維斯就協助拿玻里淘汰曼城，文仙尼對佢可謂相當了解，另一方面，拿維斯女伴曾經喺那不勒斯被賊人打劫，仲向男友大發脾氣，要即時離開呢個罪惡之城，拿維斯為遷就女友，話唔定會過檔曼城，與阿根廷隊友阿古路拍住上。