AC米蘭劏錫耶納賀壽

猪拉多纳

17/12/2011
文： 查理阿蛋

啱啱度過創會112周年嘅AC米蘭，今晚喺意甲主場迎戰錫耶納，由伊巴謙莫域領銜嘅鋒線咁勁，要劏錫耶納賀壽有幾難？1.75倍「讓球主勝」抵捧！（中央5台周日凌晨3:45直播）




雖然AC借用泰維斯嘅如意算盤打唔響，卡斯辛奴又有排都未出得，不過佢哋嘅火力本身都夠晒勁，除咗連續5仗主場有波入嘅伊巴謙莫域，中場奇雲保定、洛斯連奴都係數胡能手，加上傷愈嘅柏圖同羅賓奴都有貨交，對住今季聯賽作客未贏過嘅錫耶納，想入幾多球都冇問題。


錫耶納近7仗入得3球


AC米蘭上仗失準，只能夠作客賽和博洛尼亞，主帥阿里基已經表明會改善防務，即使守將耶比斯剛戰受傷，證實要抖10個禮拜，仍有堤亞高斯華、泰禾等擔大旗，況且錫耶納作客啞火，7場先入3球，今次造訪聖西路球場，都係乖乖哋擺低3分幫「紅黑軍團」慶生啦！