拜仁圍攻疲兵科隆

猪拉多纳

16/12/2011
文： 朱楓

睇開德甲嘅球迷，相信都知道攞冬季冠軍嘅球隊，最後都好大機會成功捧盃！今晚拜仁慕尼黑喺今年最後一次主場出擊，為擴大優勢做冬冠王，相信一定唔會放過近期勁頻撲嘅科隆，加上列貝利復出，朱楓決定捧拜仁大勝埋齋，就算讓2球照撐1.85倍「讓球主勝」！（有線61及201周六凌晨3:30直播）




矢志要重奪德甲冠軍嘅拜仁，雖然偶有閃失，但目前仍排喺榜首，領先第2同第3嘅多蒙特同史浩克3分，今晚只要唔輸，就肯定以「一哥」身份過冬，但作為班霸，試問拜仁點會滿意攞1分？更何況呢場仲係今年最後一次主場賽事，朱楓相信拜仁一定會全力爭勝報答Fans。


列貝利傷愈復出


拜仁上場作客贏史特加2:1，王牌翼鋒列貝利喺比賽中拉傷大腿傷出，但軍醫喺剛啱個禮拜一為呢位法國國腳檢查後，證實佢傷勢唔算嚴重，揚言佢今仗唔會缺席，睇得出拜仁好認真對待呢場賽事。鬼咩？原來拜仁喺安聯球場從未贏過科隆，近5次主場交手得4和1負，難得近排強勢，呢場肯定想破宿命，炒科隆有仇報仇啦！




另邊廂嘅科隆近排認真唔得閒，上周末主場大勝弗賴堡後，周中立即進行補賽僅能逼和緬恩斯1:1，睇得出呢支中型班根本應付唔嚟一周雙賽，依家休息唔夠3日又話作客拜仁，淨係體力已經輸晒。




科隆箭頭普多斯基今季已有14球進帳，以1球落後畀拜仁嘅馬里奧高美斯，本來今晚呢場「射手大戰」好令朱楓期待，但賽前有傳呢位「科隆王子」近排咁搏命，其實係想1月轉大會踢歐聯，今晚倒戈拜仁，相信好難再咁易搵到食，連續3場入波走勢應該係時候終止。