布魯日再o趙布拉加

猪拉多纳

15/12/2011
文： 黑柴

比利時聯賽水準喺歐洲向來只係三流，不過喺今屆歐霸盃分組賽嘅優異表現令人另眼相看，三支參賽球隊安德列治、布魯日同標準列治全部都位列各自小組嘅榜首，未計尋晚安德列治對莫斯科火車頭，佢哋至今喺分組賽合共15戰取得11勝3和僅1負成績，吐氣揚眉。




雖然係咁，但嚟到最後一輪，黑柴嘅比利時網上球評家戰友Lokorus建議大家睇形勢揀波，今晚叫大家捧布魯日同反標準列治，當中布魯日主場鬥布拉加（周五凌晨4時05分開賽），兩隊喺H組同得十分，領先第三位嘅伯明翰三分，布魯日作客贏過布拉加，往績佔先居首，但其實第二位嘅布拉加因為主客兩場分組賽都贏晒伯明翰，已經穩奪出線資格，反而布魯日如果輸波，仲會有出局危機。




布魯日較早前成績極差，終於喺十一月初搵嚟德國名帥達姆領軍，佢上任後立即致力改善球隊防線，帶領布魯日喺比甲同歐霸盃兩線作戰取得五戰全勝。基於球隊未確保出線，今仗主場出擊戰意點都好過已篤定出線嘅布拉加，何況布拉加防線有嚴重傷兵問題，當然捧主隊。除咗捧2.25主Ｗ外，布魯日近期五連勝半場都未領先過，擺明謀定後動，其中四次開出「和贏」，半全場「和主」有5.3倍亦值得一敲。


標準列治留力要反


至於標準列治作客對丹麥哥本哈根（周五凌晨2時開賽），標準列治喺Ｂ組已篤定出線，加上近況甚差，嚟緊周日又有對亨克嘅聯賽大戰，已事先聲明盡出副選，主隊哥本哈根要攞威，捧主Ｗ。