拉素揸K話士

猪拉多纳

14/12/2011
文： 巨高

D組拉素主場對士砵亭，先講出線形勢，榜首士砵亭已奪首名晉級資格，榜尾蘇黎世已出局，最後一個出線席位由拉素及華斯路伊爭奪，由於華斯路伊對賽成績較拉素優勝，故拉素今場就算贏波亦未必一定出線，不過觀乎拉素上輪作客華斯路伊出齊高路斯及施斯兩大箭頭攻堅，證明佢哋對歐霸盃有一定野心，加上聯賽兩連勝勇態，巨高捧拉素主W。（有線63及203台周四凌晨2時直播）


今年拉素成績咁好，好大程度與「K神」高路斯有上佳演出有關，據德國國家隊高層比亞荷夫爆料，原來高路斯擁有極高情緒商數，能夠長期保持冷靜及清晰思維，無論喺國家隊或者拉素，佢都係陣中「關鍵先生」，上仗聯賽對萊切就係靠佢完場前入波奠勝，證明早前所受傷患已完全康復，今晚歐霸盃最後一場分組賽，正正係高路斯發揮所長時候。


士砵亭已肯定首名晉級，今場好可能以副選球員應戰，留力嚟緊聯賽作客科英布拉大學好過，既然球隊缺乏戰意，拉素贏波冇難度，主W必捧。

蘇黎世冇得「伊」

同組蘇黎世主場對華斯路伊，巨高較為睇高客W。今場只要華斯路伊取勝的話，就毋須理會拉素賽果必奪次名出線資格，反正蘇黎世已經出局，說不定會賣個人情畀華斯路伊。