恥辱過後 多蒙特苦凱翻身

猪拉多纳

11/12/2011


頭場多蒙特主場鬥凱沙羅頓，多蒙特上周中喺歐聯主場輸畀馬賽，小組包尾出局，賽後遭受德國傳媒同列強球迷猛烈抨擊，亦受到爭霸勁敵拜仁高層諷刺，受到奇恥大辱後，全隊上下痛定思痛，要喺聯賽大翻身，今晚主場喜逢弱旅凱沙羅頓，係時候發洩，推介「讓球主勝」。（有線61及201台周日晚10時30分直播）




多蒙特高層季初已經明言，佢哋雖然會盡力喺歐聯爭取佳績，但聯賽先至係最重要目標，亦因為呢番說話，令佢哋每次喺歐聯失利都成為各方指摘對象，認為佢哋拉低德甲喺歐洲系數排名評分。




拜仁監事會主席漢尼斯更加喺佢哋輸畀馬賽後出言諷刺：「拜仁目前喺聯賽領先優勢大減，而且當我哋努力喺國際賽場為德國爭取榮譽時，我哋嘅對手已經舒舒服服咁喺梳化上休息，多蒙特下半季會趁我哋忙於應付歐聯時全力向聯賽衝刺，對拜仁爭霸增添難度。」更有德國報章以國家災難嚟形容多蒙特嘅歐聯戰績。


凱沙羅頓往績輸條街


受到咁多方面抨擊，多蒙特上下面目無光，今晚主場面對凱沙羅頓，點都要盡數攞番個彩，凱沙羅頓目前排緊尾三，入球能力更係全德甲最差一隊，加上多蒙特近六次聯賽主場對凱沙五勝一和，其中有四次大炒對手兩球或以上，無論實力、決心同往績都贏條街，「讓球主勝」熱都要捧。