漢諾威蓄銳劏大鱷

猪拉多纳

10/12/2011
文： 蘇斯黑柴

德甲尾場漢諾威主場鬥利華古遜，季初表現令人驚喜嘅漢諾威近績下滑，不過仍然喺各項賽事保持主場不敗金身，今仗蓄銳迎戰疲兵利華，有力坐和望贏，漢諾威受讓平半，黑柴捧下盤。（有線61及201台周日凌晨1時30分直播）




漢諾威季初連戰連捷，一度殺上聯賽榜次席，球隊擁有幾名優質攻擊球員，憑穩守快攻踢出彩虹，不過小球會始終兵源有限，喺德甲、德國盃同歐霸盃三線作戰下難免出現調整期，近八場正式賽事只得一勝，不過基於德國盃已出局，歐霸盃上輪對標準列治後亦提早出線，可以專注聯賽，啱啱周中西線無戰事回夠氣，陣容亦回復整齊，黑柴覺得佢哋已屆反彈時。


艾度拿奧爾巨人殺手


漢諾威主場勁冇花冇假，今季三線作戰十二場主場賽事，法定時間內仍然保持不敗金身，而且出名係專劏大鱷，聯賽先後斬殺三大勁旅多蒙特、雲達不來梅同拜仁慕尼黑，歐霸盃亦贏過西甲勁旅西維爾，箭頭艾度拿奧爾更加係巨人殺手，每遇勁旅都有佳作，對不來梅、拜仁同史浩克都有波入，另一箭頭前國腳舒拿達夫狀態亦返晒嚟，目前盛傳史浩克會喺稍後時間提出收購，難怪上季首席射手耶高蘭傷愈弗番都要屈居後備啦！




利華古遜過去對漢諾威往績曾經長期佔優，不過近季已有改變，近三季作客AWD球場兩和一負未贏過，佢哋踏入上月後各項賽事四場作客只贏過弱旅凱沙羅頓，啱啱周中喺歐聯作客比利時對弱旅亨克，全力出擊都未能贏波，最終大好形勢下將歐聯小組首名資格讓咗畀車路士，士氣同體力難免受損，事實上利華前鋒球員嘅把握能力根本唔及主隊漢諾威，作客讓波靠唔住。