哥連泰斯煲魚生粥賀奪冠

猪拉多纳

04/12/2011
文： 朱楓

究竟哥連泰斯定華斯高會拎今季巴甲冠軍？睇埋今晚煞科戰就知！當中哥連泰斯將喺主場同彭美拉斯合演聖保羅打吡。雖然哥連泰斯今場有3名主力停賽，不過朱楓相信佢哋仍然可以一如以往「煲魚生粥」，以勝利賀第5次喺巴甲封王，冷敲3.5倍「讓球和」！（開賽時間：周一凌晨3:00）




榜首哥連泰斯目前喺巴甲領先次席華斯高2分，今場和波，都可憑較多勝仗壓倒對手、繼05年後再度封王。哥連泰斯今場有前鋒馬斯奧艾馬臣、中場拉夫迪蘇沙同丹尼路停賽，不過呢支聖保羅市球隊勝在今季表現穩定，就好似英超嘅曼聯，聯賽21場勝仗有17仗贏對手一粒，今場對住有中堅泰亞高希蘭奴同門將馬高斯倦勤嘅彭美拉斯，好大機會食過翻尋味！


華斯高士氣曳難贏法林明高


次席華斯高如果想後上封王？今仗就一定要贏波，不過朱楓覺得佢哋好可能連呢個基本要求都做唔到，一來佢哋啱啱喺南球盃作客不敵智利大學出局，士氣大減，今場仲有中場核心祖連奴比南布肯奴同李安度利沙停賽，最大鑊係遇着嘅對手仲要喺有朗拿甸奴回勇、仲有機會爭第3直接晉級下屆自由盃分組賽嘅法林明高，真係寧捧1.56倍「讓球客勝」好過！（開賽時間：周一凌晨3:00）


爭標形勢：由於巴甲若同分的話，勝出場數較多球隊會佔先，換言之今季取得21勝嘅哥連泰斯，今仗和波足以封王，華斯高後上奪冠嘅唯一可能性，就係要自己全取3分之餘，仲要寄望哥連泰斯輸波。