迪科爾破完冰想破紀錄

猪拉多纳

30/11/2011

最近重奪熱刺正選嘅英格蘭前鋒迪科爾，賽前坦言想盡快為熱刺再入兩粒，事關迪科爾上場對西布朗「士哥」後，已為熱刺累積攻入108球，只差兩球就能追平名宿荷杜紀錄。


迪科爾近期用表現重奪領隊夏利列納嘅歡心，上場對西布朗以正選上陣入兩球，狀態全面復甦，佢賽前就話會專心爭取入球，希望可以追平名宿荷杜為熱刺入110球嘅紀錄。同時迪科爾亦大讚拍檔艾迪巴約有料到，讚呢位多哥射手控球、二傳都了得，係所有前鋒夢寐以求嘅拍檔。

愛華頓想借柏夫里約真高

不過同人唔同命，另一位拍檔柏夫里約真高，就幾可肯定會在一月轉會市場重開後離隊，因為後者希望爭取上陣時間參與歐洲國家盃，據悉莫財嘅愛華頓就想借入呢位俄羅斯前鋒。