拿玻里專打老虎 o趙埋祖記

猪拉多纳

29/11/2011
文： 九叔

如果依家要揀一隊意甲海鮮波，肯定非拿玻里莫屬，佢哋可以贏到AC、國米甚至响歐聯鋤低埋曼城，但係亦都可以衰喺卡坦尼亞、帕爾馬同基爾禾手上，不過專打老虎呢個好習慣，令佢哋今日主場出戰祖雲達斯佔晒上風，平手盤當然要揀拿玻里。（now 633及660台周三凌晨3:45直播）




家陣排意甲第8嘅拿玻里，近3場聯賽都贏唔到波，箇中原因係佢哋要分心歐聯，教練馬沙利都認如果唔係兩線作戰，拿玻里响聯賽起碼可以攞多4、5分，唔使好似依家落後榜首祖雲達斯成9分咁多。由於兩個禮拜後至踢歐聯，今日拿玻里冇咁多顧慮，又可以專心打老虎嘞。


祖雲達斯馬治斯奧坐波監


從今季賽績去睇，11戰不敗嘅祖雲達斯的確走勢好勁，但係今日作客拿玻里就冇乜條件話必勝嘞，首先佢哋近7次造訪那不勒斯都未W過，而且今場波馬治斯奧黃牌夠數要坐波監，派路隻腳亦唔多掂，上場贏拉素都係夾硬踢，主帥干地依家仲度緊個中場點擺，用艾斯迪加列比亞定基亞卓尼利都未定落嚟，真係未必o趙到拿玻里o架。