布力般爆傷兵潮撐卡城

猪拉多纳

29/11/2011
文： 郭球奇

低處未算低！球奇講緊嘅係布力般流浪，呢班波近期狀態本身已經曳到爆，但領隊堅恩仲死唔落台，最慘近日仲爆埋傷兵潮，今晚喺英聯盃8強作客英冠勁旅卡迪夫城，睇怕都係咁先，我捧主W！（開賽時間：周三凌晨3:45）




英超「包尾大幡」布力般流浪今季狀態極曳，啱啱喺聯賽作客又輸畀史篤城1:3，成為今季首支失波達到30球大關嘅球隊，點知近日多次被球迷要求下台嘅領隊堅恩仲未知死，反而猛讚球隊防守已經好咗好多。平心而論，堅恩都真係幾慘，事關繼隊長賴恩尼爾遜後、沙加度、馬田奧臣同基斯杜化森巴3名大將先後打柴，今晚好大機會繼續缺陣。


卡迪夫城8戰不敗


同布力般啱啱相反，卡迪夫城今季喺英冠表現突出，日前主場贏森林後，已累積8場不敗，榮升「老三」，下季好有機會升上英超，但話晒都已經入到英聯盃8強，相信都會搏埋落去，畢竟呢班波本身人腳唔曳，前鋒堅尼米拿、安梳爾、中場韋定咸等主力好多都係英超球會出身，主場出擊真係捧得過！