祖記恃惡掃里場

猪拉多纳

29/11/2011
文： 巨高

意甲拿玻里主場對祖雲達斯早前因天氣關係取消，本周三凌晨進行補賽。祖記為現時意甲唯一不敗球隊，為保榜首優勢鬥志鮮明作客都冇有怕。拿玻里慘被地獄賽程摧殘，連鬥拜仁慕尼黑、拉素及曼城之後，上仗對阿特蘭大已疲態畢露，有一分落袋算執到。拿玻里腳仔軟，面對重拾霸氣嘅祖記相當難打，平手盤必捧客隊。（now 633及660周三凌晨3時45分直播）




拿玻里人腳不足問題，教練馬沙利已不只一次提出，故老闆迪羅倫迪斯已答應收購新球員。惟轉會市場要到明年一月先至重開，即係話拿玻里原有班底要繼續捱埋落去。咪以為拿玻里主場氣勢強勁就可彌補不足，要留意聖保羅球場只「恰」到外國球隊，意大利本土球隊去慣去熟，影響相對較低，就連帕爾馬今季都能以作客身份砌低拿玻里，無理由祖雲達斯唔得。


拿玻里鐵三角當黑


而且最近拿玻里球員都受私人問題所影響，其中咸錫太太及拿維斯模特兒女友Yanina Screpante都先後被賊人以手槍挾持打劫，而卡雲尼返烏拉圭出席國際賽時，屋企又被爆格。拿玻里鐵三角都遇到不快事件，對佢哋心情必有影響，尤其喺出外比賽期間，擔心女伴又畀人搞。其中Yanina Screpante已於網上表示，會盡快離開罪惡之城，消息令到拿維斯相當冇癮。




祖雲達斯殺得性起，今季擺到明要重奪聯賽冠軍，已擊敗過米蘭雙雄及拉素等競爭對手，相信拿玻里呢一關都難唔到佢哋，平手盤一定揀祖記。